طريقة حفظ الاطعمة

اولا الطماطم :

نجيب الطماطم مستوية وبعدين نضربها فى الخلاط ونصفيها بصفايه .. وبعدين نحط لكل كيلو طماطم تلات ملاعق سمن ونسيبها لحد ماتنشف مايتها خالص وبعدين نحطها فى اكياس وكل كيس على قد الاكلة..

ثانيا الثوم:

نشترى الثوم فى شهر مايو لان سعره بيكون رخيص وكمان بيكون مش جديد فيبقى تقشيره صعب ولا قديم فيبقى فاضى ....
نجيب الثوم ونقشره ونحطه فى الخلاط ونحط معاه لكل كيلو ثوم اتنين ملعقة كبيرة زيت ونص ملعقة ملح... ونضربهم لحد مايبقى ناعم... ونحط معظم الكمية فى برطمان زجاجى (والزيت عشان لون الثوم مايتغيرش وكمان يحتفظ بالنكهة بتاعته.. اما الملح عشان مايجمدش فى الفريزر ونعرف ناخد منه بالمعلقة بطريقة سهلة).... اما باقى الكمية نحط معاهم فى الخلاط فلفل اخضر وكسبرة خضرة وكمون كتير ونضربهم مرة تانية لحد ما المكونات تنعم ونحطهم فى برطمان تانى عشان تتبيل السمك وطواجن الجمبرى والكاليمارى.. وتتبيلة البدنجان المخلل وحاجات كتير.......وبيقعد من السنة للسنة اللى بعدها....

ثالثا البسلة:

نجيب البسلة ونخرج حبوب البسلة من قشرتها ونحطها فى كيس مع جزر مقطع مكعبات صغيرة ... وبس

رابعا الفاصوليا:

نقطع طرفى الفاصوليا وبعدين نقطع الفاصوليا الى قطع متوسطة وبعدين نكون حاطين على النار حلة فيها ماء مغلى وملح ونسقط الفاصوليا لمدة دقيقة بعد ما نشيل الحلة من على النار ونصفيها فى مصفاة وبعد متتصفى خالصن كون مجهزين طبق فيه ماءوثلج كتير ونحط المصفاه بالفاصوليا في الماء المثلج لمدة ثوانى حتى تحتفظ بلونها اخضر زاهى ..... ونصفى الفاصوليا مرة اخرى ونعبيها فى اكياس على حسب الأكلة..

خامسا الخضرة:

بالنسبة للبقدونس والكسبرة والشبت نغسلهم كويس اوى وننقعهم بعد كده فى ماء مضاف ليه معلقة خل وبعدين نفرمهم ناعم اوى بمخرطة الملوخية ونصفيهم لمدة ساعتين على قطعة قماش وبعدين نحطهم فى كيس وكل ما نحتاج شويه ناخدهم من الكيس على طول..وبنستخدمه لخلطة المحشى والممبار والفول بالتقلية وساعات لما بيكون عندك عزومة افرشهم تحت الاكل فى الطبق او رشهم على الطبق ...

سادسا البطاطس المقلية:

نقشر البطاطس ومغسلها بعد مانقشرها بس... وبعدين نقطعها صوابع متوسطة وطويلة.. وننقعها فى ماء ساخن وملح وخل وملعقة سكر..(لكل كيلو بطاطس 1لتر ماء ساخن و3ملعقة ملح صغيرة وربع كوب خل وملعقة سكر) ونتركها فى الماء منقوعة لحدمايبرد (مش اوى )يكون دافئ ونحمرها فى زيت غزير وساخن جدا ونقلبها باستمرار لكن بعد ما تاخد اللون الاصفر الفاتح.. ونقلبها لحد لونها ما يبقى دهبى فاتح وأنشلها على ورق ماص للزيت و نسيبها لحد ماتبرد وبعدين نحطها فى علبة بلاستيك فى الفريزر... ونخرجها فى اى وقت على الطاسة اللى فيها زيت ساخن جدا على طول من الفريزر(عشان درجة برودة البطاطس هتقلل درجة حرارة الزيت فلازم يكون الزيت سخن اوى اوى)

سابعا ورق العنب:

نقوم برص ورق العنب واحدة عكس واحدة... يعنى نمسك الورقة من العنقود واحطها فى اتجاه معين والورقة اللى بعدها نخلى العنقود فى الجهة الاخرى .......ونشيلهم فى اكياس فى الفريزر ولما نطلع الكيس نسلق ورق العنب وهو متجمد..

ثامنا الباميه:

نقمع البامية ونغليها لمدة تلات دقائق فى مية مغلية على النار و نطلعها من المية المغلية على مياة فيها مثلجة(فيها تلج)ونصفيها كويس من المية ونشيلها فى اكياس ولما نستخدمها نحطها وهى متجمدة مش نسيبها تفك عشان لونها يبقى حلو مش غامق..

خامسا الموز:

لكل كيلو موز ربع كوب لبن و2 ملعق سكر و نضربه فى الخلاط هايبقى عندك جرانيتا موز تحفة ... ناخد منها بالمعلقة ونعمل عصير موز باللبن او نحطها على فروت سلاط بدل الأيس كريم ونحطها كمان على الكيكة وهية لسه طالعة من الفرن (ساخن مع بارد)

سادسا الجوافة:

ناقطعها شرايح واحط عليها سكر و نشيلها فى الفريرز فى اكياس حسب الحاجة...

سابعا البلح الرطب (الاسمر):

نشيله فى برطمان بعد ما نشيل النوى ونقسمه نصفين..نحطه بالطول جنب بعض وده بيسهل انى اخد منه من غير مايتقطم .. وعلى فكرة مش بيتجمد أبدا" .. وبعمل منه تارت البلح وكيكة البلح فى اى وقت فى السنة...

ثامنا الرومان:

نفصص الرومان ونخرج الحب ونحط عليه سكر ونشيلة فى اكياس ... ومش بيتجمد برضه.. ونستخدمه فى الفروت سلاط وسلاطة الرومان وتارت الفواكه وكزينة لكثير من الحلويات والايس كريم.. وكمان نعمله عصير ونصفيه ..

تاسعا العنب:

نشترى العنب اللى حباته كبيرة سواء كان أحمر أو أخضر.. ونشيله فى اكياس بعد ما نفرط العنب من العنقود ونغسله.. وناخد كمية منه و نسيبها يومين على صينية كبيرة مفروشة بورق ابيض وعلى الورق فوطة قماش .. وبعدين نجيب حلة ونحط فيها ماء مغلى وزيت لوز (لكل لتر ماء ملعقة زيت لوز صغيرة) ونضع فيها العنب بعد ان أصبح ذابلا" لمدة ثلاث دقائق وبعدين نصفى العنب وبعدين نحطه مرة تانية على نفس الصينية و نسيبها فى مكان مشمس اوى لمدة عشرة ايام وكل يوم نقلبه.. هايبقى عندك زبيب بيتى ..

عاشرا" الليمون والبرتقال البلدى:

الاتنين نعملهم بنفس الطريقة... الاول نبشر قشر الليمون اوالبرتقال بمشرة صغيرة اوى.. ماتبشريش الجزء الابيض... ونحتفظ بيهم فى علب تلاجة صغيرة اوى او برطمانات صغيرة .وبعدين نقسم الليمون والبرتقال اللى بشرت قشرتهم نصفين ونعصرهم كويس ونحطهم فى علب مكعبات التلج ... ونعملهم مكعبات ليمن وبرتقال.. وكل مكعب على قد كوب العصير لو قلبناه كويس مع ماء وسكر... او كميه مكعبات فى الخلاط مع مياة وسكر.......وكمان مكعبات الليمون نتبل بيها الفراخ والبفتيك مع باقى المكونات طبعا.. ونعمل منها كل حاجة.. الشربات بتاع الحلويات.. ونغلى مع مكعب ليمون شوية مياه فى اى حلة المونيوم يكون لونها بقى غامق... وحاجات تانية كتير .. يعنى انتى ومزاجك..

» طريقة اصلاح الجوال اذا سقط في الماء
» طريقة عمل مصاصة كيكة بالصور
» طريقة معرفة المتصل وهو حاط (( الظهور دون اتصال ))
» شرح لتلوين اسماء الاعضاء و المشرفين بدون هاكات طريقة رائعة منتديات نجوم + مثال مباشر